Хани нүхэдэй зүрхэн халуухан...

Чингис хаанайшье гайхамшагта туйлалтанууд тэрэнэй хүлэг баатарнуудайнь — үнэн нүхэдэйнь — нугаршагүй дэмжэлгээр бэелэгдэһэниинь мэдээжэ. Энэ мэтээр хүн түрэлтэнэй эрхим заншал — хани халуун харилсаан түүрээгдэнгүй яахаб даа. Ажабайдалай харгыгаар ганзага тааран ябадаг, унахада — дүнгэн бодхоодог, урмаа хухархада — этигэл найдал түрүүлдэг хани нүхэд юунһээшье сэнтэй!



Мүнөө хэлэгдэхэ дурсалгын гол удхань гэбэл, Буряад ороной гуа сэсэн хатад, элитэ түрүү багшанар, арадайнгаа соёл гэгээрэлдэ түншэтэй хубитаяа оруулһан Цырен-Ханда Жамcуевна Жамьянова ба Буда-Ханда Жигмитовна Цырендоржиева хоёрой хоорондын хани халуун харилсаан.



Жамьянова Цырен-Ханда Жамсуевна — Яруунын аймагай Эгэтын-Адагай дунда hургуулиин буряад хэлэнэй ба литературын багша, РСФСР-эй ба СССР-эй арадай гэгээрэлэй отличник, Буряад республикын габьяата багша, уран бэшээшэ, олониитын эдэбхитэн. 

Ц-Х.Ж. Жамьянова Яруунын аймагай Баруун-Үльдэргэ нютагта 1942 ондо түрэжэ, 1949 ондо эхин класста орожо һуралсаа. Басаганай һалгай гараараа гуурһаа бариха дүрэтэй байһыень, Бүүбэй Жалсановна багшань зүүн гарынь уяжа, баруун гараарнь бэшүүлжэ һургаа юм. Зүүн-Үльдэргын 7 жэлэй һургуулида, Мужыхын дунда һургуулида һуража гараа. 1964 ондо Улаан-Үдын багшанарай дунда һургуули түгэсхэжэ, эхин классуудта багшалжа эхилээ. Тайлуудай, Үльдэргын һургуулинуудта түрүүшынгээ дадал олоо. 1967 онһоо Эгэтын-Адаг нютаг руу хадамда гаража, эндэхи һургуулиин эхин классуудта, һүүлээрнь багшын дээдэ һургуулида заочноор һуралсажа гараад, буряад хэлэ бэшэг ба литература заажа эхилээ. Энэ ажалдаа аша үрэ ехэтэйгээр хүдэлжэ, буряад хэлэнэй суутай багша боложо тодорһон. 



Цырен-Ханда Жамсуевна багшалжа эхилхэһээ хойшо түрэл арадайнгаа түүхэ домог, ёһо заншалда һаналаа табижа, саашадаа орхигдошоно аа гү гэжэ сэдьхэлээ зобон, яажашье һаа шабинартаа дамжуулха зорилго урдаа табяа. Тэрэ үедэ үндэһэтэнэй асуудалаар хэлсээн болодоггүй шахуу һэн. Тиин багша өөрынгөө эдэбхи үүсхэлээр этнопедагогикын талаар габшагай ажал ябуулжа, «Буряадай соёл болбосорол» гэhэн удхатай хэшээлнүүдэй түсэб-программа зохёогоод, 5-9-дэхи классуудта заажа захалаа. Халуун зүрхэтэй, хурса хэлэтэй, сэсэн бодолтой багшынгаа абьяас хүсөөр һурагшад угсаата ёһо заншал, уг гарбал, угайнгаа һарбаалжан, нютагай түүхэ домогууд гэхэ мэтэ мэдэсэнүүдые һанаан бодолдоо марташагүйгөөр шэнгээхэ золдо хүртөө. Илангаяа «Угай һарбаалжан» гэһэн темээр ехэ хүдэлмэри хэгдээ. Үхибүүд гэртэхинһээ уг гарбал, элинсэг хулинсаг тухайгаа асуужа, хэдэн үе хурга даран тооолодог болоо. Эгэтын-Адагай суутай үльгэршэн Рэгзэн Эрдынеевич Эрдынеев нютаг зонойнгоо угай һарбаалжан хуруу хухадгүй мэдэхэ байжа, ехэ туһа хүргэһэн. Үбгэн үльгэршэн Цырен-Ханда Жамсуевна хоёр «түхэреэн шэрээ» гулидхажа, нютагай эдэбхитэдые ударидан, угсаатанайнгаа ёһо гурим, жаяг заршам һэргээхэ олон үйлэ хэрэгүүдые эрхилжэ, анха түрүүлэн Эгэтынгээ-Адагта Сагаалганай найр эмхидхэжэ хүшэгэнүүлээ. Зон буряад хубсаһа хунараа оёжо, эдеэ уһаа бэлдэжэ, моридой тоног зэмсэг, хашабаа шарга мэтэеэ хэжэ, дархалжа эхилээ.



Мүн 1994 ондо Эгэтын-Адагта үнгэргэгдэһэн Гэсэрэй 1000 жэлэй ойн баярай наадамай бэлэдхэлдэ бии хүсөөрөө оролсоо. Багша өөрөөшье, шабинарыншье Буряад республикын аймаг хотонуудаар, Усть-Ордагай ба Агын автономито округуудаар үнгэргэгдэһэн олон тоото суглаа хуралдаан, эрдэм шэнжэлгын конференцинуудта хабаадажа, магтаал солодо, урмашуулгын шангуудта саг үргэлжэ хүртэжэ ябаа. Багшынгаа даабаряар үльгэр түүрээжэ, түүхэ шэнжэлжэ, «Угай модо» зуража һураһан шабинарынь наһанайнгаа олзо олоо. Угсаатанайнгаа энжэ баялигые улам саашань, өөһэдынгөө хүүгэдтэ, аша гушадаа дамжуулха зон хүмүүжүүлэгдэбэ ха юм. 



Цырен-Ханда Жамсуевна хизаар ороноо шэнжэлэгшэ, хүдөөгэй эдэбхитэн байхаһаа гадна, аймагайнгаа «Улаан Туяа» («Ярууна»), республикын хэмжээнэй «Буряад Үнэн» һонинуудта, «Байгал» сэтгүүлдэшье удхатай статьянуудые, үгүүлэлнүүдые, шүлэгүүдые саг үргэлжэ бэшэжэ толилуулдаг, хүдөө бэшэгшын үнэмшэлгэтэйшье байһан. «Алтан субарга бодхооном» гэһэн очеркнь «Манай үеын хүн» гэһэн конкурсда илажа гаража, «Гуа сэсэн хатан» гэһэн нэрэ хүндэдэ хүртөө. Хэдэн номуудые хэблүүлээ: колхозой түрүүлэгшэ Р.Ц. Банзарон тухай «Колхозой түрүүлэгшэ — съездын делегат», очерк, статья, шүлэгүүдые багтааһан «Алтан субарга бодхооноб», «Барагдашагүй баярай үдэшэ» гэһэн номуудые бэшэжэ хэблүүлээ. «Үреэл тогтохо болтогой» гэһэн суглуулбари соо багса үреэлнүүдынь оронхой. Бэлигтэй композитор Ринчин Бурхиевтэй эбтэйгээр хүдэлжэ, олохон шүлэгүүдынь аялга хүгжэмөөр далижан, үргэн буряадтаа тараһан. Илангаяа мэдээжэ «Буряад орон» гэһэн дууниинь Абида хүбүүнэйнь хүбүүд, Алдар Амгалан Дондоковууд ашанарайнь гүйсэдхэлгээр олондо абтасатай угтагдаа. Хоёр ашанарынь хүгшэн эжынгээ заабари заршам шэнгээнхэй, хайрата эжынгээ үнэн сэдьхэлһээ бэшэһэн дууе зоной сэдьхэлдэ хүргэһэндөө баяртай. 



Грамматикаар «Фонетикэ», «Лексикэ», «Морфологи» гэhэн хэhэгүүдые заахада хэрэглэмээр схемэ, таблицануудые тон тааруугаар өөрөө һанаашалан зураһыень, хэлэ бэшэгэй багшанар һонирхон харадаг, хэшээлнүүдтээ дам хэрэглэдэг һэн. Шабинарайнгаа хэлые баяжуулха, уян нугархай болгохын тула «Нютагай домог» гэһэн уран зохёолой ба драматическа кружогуудые ябуулаа. Тус дугуйландаа хуушан монгол хэлэшье үзэдэг болоһон байна. Багшын оролдолгын дэмы бэшэ байһыень буряад хэлэнэй олимпиадануудта илаһан, хожомынь сурбалжалагша, зохёолшо болоһон шабинарынь гэршэлээ. Цырен-Ханда Жамсуевнагай түрэлхи хэлэ заалгаар бүтээһэн методическэ хүдэлмэринүүдынь, арга дүршэлынь буряад һургуулинуудта тон ехэ нүлөө үзүүлээ. Мүн арадай хэрэгтэ, олониитын ажалда улаагаараа оролсожо ябаһаниинь зоной дурасхаалда мартагдашагүй.

Цырендоржиева Буда-Ханда Жигмитовна — Агын буряадай автономито тойрогой Догойн ба Агинскын дунда һургуулинуудай буряад хэлэнэй багша, Россиин Федерациин габьяата багша, РСФСР-эй арадай гэгээрэлэй отличник, уран бэшээшэ. 
Тэрэ 1941 оной декабриин 31дэ Агын тойрогой суута Согто-Хангил нютагта түрэhэн. Согто Хангилай, Агын, Зугаалайн дунда һургуулинуудта һуралсажа гараа. Ажалайнгаа намтар Агын нэгэдэхи дунда һургуулида пионервожатаар хүдэлжэ эхилһэн. Эдэбхи үүсхэлтэй пионернүүдэй хүтэлэгшэ тэдэнэйнгээ ёһотой ударидагша, залан дахуулагша ябаа гэхээр. Һайн юумэниинь, тэрэ сагта хайшаашье харгынууд нээлгээтэй байһан. Тиимэһээ залуухан вожата урма зоригтойгоор үхибүүдээ дахуулаад, Артек, Орлёнок, СССР-эй хэмжээнэй слет, конференцинуудта абаашадаг байгаа. Саашадаа Буряадай гүрэнэй багшын дээдэ һургуули түгэсхэжэ, Согто-Хангилай, Догойн һургуулинуудта багшалаа. Наһанай амаралтада гарахынгаа урдахана Агын 1-хи дунда һургуулида хүдэлжэ гараа. Багшаар хүдэлхэ сагтаа методистын ажал ИУУ-да ябуулдаг, һурагшад, оюутадай үзэхэ хэшээлнүүдые зохёодог, радио, телевидениин дамжуулгануудта хабаададаг, сэтгүүл сонинуудта һонин мэдээсэлнүүдые бэшэжэ толилуудаг һэн. Сүлөө сагтаа бэшэһэн шүлэгүүдээ «самоиздат» хэжэ, суглуулжа гаргадаг байһаниинь, тэдэнь хаягдаагүй үлэбэ ха юм. Тиигэжэ һаяхан «Буряад-тв» дамжуулгада Саяна басаганиинь уншажа, харагшадые һонирхуулаа. Буда-Ханда Жигмитовнагай тон ехэ ажалынь гэбэл, бүхы наһаараа суглуулжа ябаһан тэмдэглэлнүүдэйнгээ удхаар «Хүн болохо багаһаа» гэжэ угсаатанай ажабайдалда хабаатай һургаал заабариин алтанһаа сэнтэй ном бэшэжэ, 2000 ондо толилуулһан байна.



Хаанашье хүдэлжэ ябахадаа, Буда-Ханда Жигмитовна гансал хэшээлээ үгөөд гаража ошодоггүй һэн. Тэрэ хаана юун болоноб, хамаг үйлэнүүдтэ үнэн зүрхэнһөө хам оролсожо ябаа. Һургуулида, нютагта, аймаг тойрогто, бүгэдэ буряадташье хабаатай ямар хэмжээябуулганууд үнгэрнэб, Буда-Ханда Жигмитовна, мүн багшаар хүдэлдэг Ёндон Ринчинович нүхэртэйгээ дундууса оролсон ябаа. Буда-Ханда Жигмитовна уран үгэ холбохо түрэлхиин бэлигтэй байһанайхи, элдэб конкурс, мүрысөөнүүдтэ хабаадагшадай хэлэхэ үгэнүүдынь, найруулга-сценаринуудынь зохёожо, өөрөөшье найруулан табидаг һаабза. Бэшэһэн шүлэгүүдтэнь композиторнууд дуу зохёоһон зандаа. 1990 ондо Буряад орондо Гэсэриадын 5 жэл соносхогдожо, ехэ хүдэлөөн болоһон. Буда-Ханда Жигмитовна одоол энэ хэрэгтэ оролсонгүй яажа байхаб? Усть-Ордада, Агада, Буряадай аймагуудаар үнгэргэгдэһэн Гэсэрэй нэрэмжэтэ найр наадануудай үеэр Гэсэр, дангина, үльгэр түүрээгшэд, зүжэгшэд гэхэ мэтэ бүхы хабаадагшадтаа тумагүй хамһалсажа ябаа. Дуу дуулажашье, хатаржашье ядаагүй хадаа Эгэтын-Адагта 1994 ондо болоһон Гэсэриадада өөрөө хабаадалсажа, «Хатан-1994» мүрысөөндэ 3-хи һуури эзэлээ. Иишэ ерэхэдээ, Цырен-Ханда Жамсуевна хани басагандаа нүхэртэеэ сугтаа айлшалһан байна. Цырен-Ханда Жамсуевнагай наһанай нүхэр Батор Дашицыренович иигэжэ дурсаа: «Агаһаа бууһан нүхэдтөө нютагаа харуулжа, Зандан-Жуу бурханда мүргэжэ, хүдөө талаар, Үдын эрьеэр сэнгэжэ, яһалашье хүхилдөө, эльгэлээ һэмди». 1995 ондо Улаан-Үдэдэ үнгэрһэн Гэсэриадын түгэсхэлдэ Аюша, Цырена басагадынь хабаадалсан, түрүүшын һууринуудые эзэлжэ, Ага нютагаа суурхуулаа юм.



Буда-Ханда Жигмитовнагай үшөө нэгэ бэлигынь гэбэл, буряад эхэнэрэй заншалаар «альганай шэнээн торгоор арбан захатые бүтээхэ» арга дадалынь һэн. Хубсаһа хунар оёхо, эсхэхэ аргагүй ехэ абьяастай байжа, гурбан басагадаа багаһаань гоё һайханиие сэгнэжэ ябахаар һургаа. Мүнөө ууган басаган Саянань үндэһэтэнэй хубсаһанай «Моодын гэр» эрхилжэ, угайнгаа һүлдэ үргэмөөр һайхан бүтээлнүүдые оёжо, янзын харалга, мүрысөөнүүдтэ хабаададаг заншалтай. 

Эхэ хэлэнэйнгээ тугые дээрэ үргэжэ ябаһан, Алангуа, Бальжан хатадай дүрбэн тэгшэ бэлигые энжэлһэн, хүсэл зоригоор түгэлдэр, сэсэн мэргэн буряад хатадай эбэршэгүй хани нүхэсэлэй утаһаар холбоотой байһандань баясан омогорхомоор. Цырен-Ханда Жамсуевнагай ори гансахан Абида хүбүүгээ алдажа, уйдхар гашуудалда абтан байхадань, өөрөөшье хүндөөр үбдэжэ байһан Буда-Ханда Жигмитовна ханинь сэдьхэлээ ехээр зобон, һамааруулха аргагүйдөө тэбшэ ядан, досоонь үймэлдэн байһан хамаг мэдэрэлнүүдээ саарһан дээрэ моторлоо бэлэй. 



«Алтан субарга бодхооноб» гэһэн номыень хинан хаража гаргалсаһан Буряадай элитэ уран шүлэгшэ, «Буряад Үнэн» сониной урдаа хараха сурбалжалагша Цырен-Дулма Цыреновна Дондогой тус бэшэгэй ном соонь юундэ оролсохо ушартай байһан тухайнь иигэжэ тайлбарилаа"

«Байгаали бурханай хайрлаһан хэтэ мүнхын бэлэг гэхэ гү, али ямар нэгэн онсо бэлиг ямаршье хүндэ үгтэдэг. Зарим нэгэнэй бэлиг эрьеһээ халиһан уһан мэтэ, олон һабатай байха: юумэ бэшэхэ, зохёохо, дуу дуулаха, уран гоёор уншаха, зураг зураха, урлаха.
Цырен-Ханда Жамсуевнагай һайн хани басаган Агын автономито тойрогой эрхим багшанарай нэгэн Буда-Ханда Жигмитовна Цырендоржиева бэлигтэй хүн байһан юм.

Ажабайдалда тон эдэбхитэй, уран гоё үгэтэй, өөрөө шарайгаараашье, сэдьхэлээрээшье һайхан, Б-Х. Жигмитовна манай редакциин соёлой таһаг руу орожо ерэдэг, һонин һорьмойгоо дууһыень хөөрөөд гарадаг юм һэн. Юундэб гэбэл манай таһагта ажалладаг байһан поэт Булад Жанчиповтай БГПИ-дэ хамта һураһан байгаа.

«Гэсэрэй» 1000 жэлэй ойн баярай түгэсхэлэй нааданай Улаан-Үдэдэ болоходо, гэр бүлөөрөө хабаадажа, лауреат болоо бэлэй. Тиимэһээ Б.Х. Жигмитовнагай, Саяна басаганайнь бэшэгүүд энэ ном соо орохол ёһоороо ороо. 
редактор Цырен-Дулма Дондогой.

Номой автор Цырен-Ханда Жамсуевнагай нүхэр басаганайнгаа һүүлшынь бэшэгые номдоо оруулһан ушарынь зүрхэ сэдьхэлэй уяран доһолмоор үйлэ, үнэн һайхан хани нүхэсэлэй, хүнэй нигүүлэсхы сэдьхэлэй хэтын гэршэ болон мүнхэрөө.
Хайрата һанаха һайхан нүхэрэйм һүүлшын бэшэг 

Мэндээ!
Эрхим хүндэтэ бүлын түрүү Баатарта,
Эльгэ нимгэхэн гуламтын эзэн Цырен-Хандада,
Абьяас бэлигэй сутан болоһон таанартаа
Ажалай амжалтын эзэн гэгдэһэн та хоёртоо,
Аяар холын Ага найман эсэгын нютагһаа,
Арюун дулаан эгэшэш мэтэ сэдьхэлээ шэнгээжэ,
Аха дүү мэтээр альга хабсаран доро дохижо,
Амар амгаланиие айладхажа мэндэшэлнэб.
Операциин һүүлээр орогүй хожом, оройтожо,
Ёро мууса оһол болоһыень «Үнэндэ» уншажа,
Халуун зүрхэндэм уйдхарай улаа бутаржа,
Хара бууха хайрын сэдьхэл унан хүмэрижэ,
Зохида тааруу зөөлэн үгэнүүд тиихэдэ хомордожо,
Золгүй тудаһан үйлэ эрьюулхэ аргагүй ядаржа,
Удааршоолби даа, оншотой зөөлэн үгэ бэдэржэ,
Мүнхэ зулын гэрэлдэ бэшэг бэшэжэ һуунаб,
Мүнгэн голтын бадараанда тоһо нэмэжэ байнаб,
Мүнхэ зулын гэрэл хадаа минии нэмэрлихэ буян гээшэ,
Мүнөө бэшэгшэ бэшэгни манай нүхэсэлэй гэршэ гээшэ.
Энхэ жэлэй гэрэлтэ оршондо хүбүүнтнай боложо түрэһэн,
Эсэгын нэрые энэ дэлхэйдэ өөдэнь үргэжэ ябаһан, 
Эхын энхэрэлые эльгэн дундаа эбигээлээр хадагалһан,
Эрын эрхим эрхэ тангил Абидынтнай мордошоһондо,
Зүрхэмни дэлбэрэн алдатараа булангиртан булгилжа,
Зүүдэндээ таанартаяа зориг ядан оло дахин уулзажа,
Зүйргүй ехээр танай бүлэнэрые хайрлан сэдьхэжэ,
Зүнтэглэтэрөө шаналха уйдхарыетнай хубаанаб.
Урагшалха сагай хэтэ мүнхын жама эрьесэдэ
Оршолондо хубаалдаха үритэй байба гүб гэжэ бодожо,
Хүн түрэлтэнэй эдлэхэ ёһотой бөөн ехэ зоболонһоонь
Хүйһөөрөө тэлэжэ, хороолсобо гээшэб гэжэ бодожо,
Бурхан багшын урда үбдэг дээрээ наманшалжа. 
Буян хэхэ. Ондоо яахашье огто туһа болохогүй.
Газар дээрэ гансаарандамнай гасалан тудашоо бэшэ, 
Гажаралаа ашанарһаа яажашье һаань нюужа шадаха.
Эльгэ дорьбохо эхэ танай хэмжэшэгүй гашуудалые,
Эбэр номото эсэгэ хүнэй газар мүргэмэ харамсалые
Энхэрхэ нүхэдтнай хороолсохо шадалгүйдөө ядана.
Эгээл дундуурынь тэн хахадлаха хабагүйдөө яндарна.
Аргагүйл алдашын амадан тодожо ерэбэлыньш,
Ашанараа үндылгэжэ, ажаллажа, уйгаа тарааха,
Амтан түнтүү аяг ааша, амжалтадань һамааржа,
Алтан һайхан бэри басагандаа хамһалсажа сагаа бараха.
Тэнгэриин орондо бодисада бурхан боложо түрөөд,
Тэндэһээл таанартаа үршөөл хайраяа эльгээжэ,
Үтэлхэ сагтатнай үри хүүгэдээрээ үргүүлжэ,
Үншэрхэгүй амгаланаар хойто наһандатнай үдэшүүжэ.
Түбиин дээдэхи Сухаваадиин орондо бурхан боложо түрөөд,
Түүхэ үльгэртэл тэндэ тэбэрилдэн ушархатнай болтогой!
Масаг хооһоноор зальбарал һүзэгөөр тэндэ амидаржа
Маани мэгзэмээр буян хэшэг үдхэжэ һуугаарайгты.
Аяарай холоһоо Хори буряадай Харгана, Шарайдай
Анда нүхэд Ёндон, Будаханда болон бэшэншье
Аяа хайрата та хоёрто зүрхэнэй гүнһөө хандажа,
Аршалха шэдишьегүй һаа, үнэн хайраяа мэдүүлнэ.
Һула яндан мэдэрэлдэ мэрүүлэн бүтүү диилдэжэ,
Һугшажал бү ябагты, байха бэеэ шангал баригты,
Хэдынэйш сагта ажабайдалай хамаг хүшэры дабажа,
Хэтэ сахюуртал нугаршагүй хатуу ябахаа зориё!
Өөһэд тухайгаа удхалан холбожо бэшэхэ гэхэдэ,
Өөдэтэй тиимэ һонинш юумэ олдохогүй байна.
Эртэ хабарһаа Шэтын эмнэлгэдэ удаан хэбтэжэ,
Эдэгэхын тухай хоёр дахин һубаряа отолуулжа,
Август һарын арбан гурбанай нарата үдэр гаража,
Ага худараа бусаа һэм даа, ехэл аза талаантай.
Оройн намар ноябриин тэндэ дахяад Шэтэ ерэнхэй,
Операцида орохоёо, удаан саг соо шэнжэлүүлжэ байнаб.
Юһэдэхи һарын дүрбэнэй үдэр хариин урагууд буужа,
Юрын лэ буряад ёһо заншалаар бурханда хадаг табижа,
Ашата бурханда зула бадараажа, галда сусал нэмээжэ,
Аюуша басагыемнай бэри буулгахаяа зүбшөөл абаба.
Энэл һарынгаа арбан хоёрой амаралтын үдэртэ
Эжэл зоноороо буряад ёһоор басаганай наада хэжэ,
Москва хотодо ажаһууха, ажаллахыень зүбшөөжэ,
Мордохуулаа һэмди хоёр үриеэ булта баяртайнууд.
Будахандын басаганай бэшэг

Дорогие и уважаемые Батор ахай и Цыренханда абгай!
Пишу вам я, Саяна, старшая дочь Цырендоржиевых.
Сразу после похорон мамы я нашла письмо, адресованное вам. Спрятала хорошо, чтобы не потерять и отправить вам. Да, видно, так хорошо я спрятала, что все эти годы искала и не нашла.
И вдруг оно на днях, само упало вместе с тетрадью, в которую было вложено, когда я искала счет-фактуры.
Конечно, без слез снова прочитать было невозможно...
Возможно, мама настолько сильно переживала горечь утраты вами вашего сына, что так не смогла отправить, а может, хотела, но уже не вставала...
Теперь не узнаем.
Но то, что письмо адресовано вам, дает мне мысль отправить его адресату.
Может быть, оно не находилось, потому что время, залечивающее раны еще не пришло.
А теперь вот... отправляю...
Близко не знаю, но всей душой люблю вас, как близких друзей моей мамы, которая могла посвятить вам эти строки.
Целую! Саяна Гуруева. Читинская область, п. Могойтуй, ул. Забайкальская, д.1, Гуруевы: мой муж, Саяна, Аюр, Аюн, Арюн.
P.S. Прилаживаем, как дар в память о маме «самоиздат» её стихов и её песню.